Pages

ചില കാര്യങ്ങൾ

സ്നേഹം       

ഇത്തിരി സ്നേഹം തോന്നിയപ്പോൾ 
ഒത്തിരി ദേഷ്യം കളഞ്ഞുപോയി

പേര് 
പേരില്ലാത്തവന്റെ കൂടെയല്ല 
പോരില്ലാത്തവന്റെ കൂടെയാണ് 
പെരുമയോടെ പേര് നിൽക്കൂ

വിശപ്പ്
വിശപ്പുമാത്രമായിരുന്നു 
ഭക്ഷണത്തിന്റെ മുന്നിൽ തലകുനിച്ചത്

സെൽഫി

അങ്ങനെ ഒരു സെൽഫിയെടുക്കാൻ 
മൊബെയിലിനോടൊപ്പം കൈ നീട്ടിപ്പിടിച്ചു


വാക്കുകൾ 

ഉപയോഗിച്ചു പഴകിയ വാക്കുകളാണ് 
തെരുവിൽ പ്രയോഗത്തിൽ ഉള്ളത്
അതിലൊന്നാണ് നിങ്ങൾ കേട്ടത് 
 
രക്ഷ 

രക്ഷയില്ലാതായപ്പോൾ 
രക്ഷാബന്ധനം ചെയ്ത് 
സോദരരായി വാഴാൻ തീരുമാനിച്ചു 
അതിൽപിന്നെ അയാളുടെ കണ്ണുകൾ 
കീറിപോയ എന്റെ ആകാശത്തിനു കൂട്ടായി
 
 ഇരട്ടപ്പേര് 

ശരിക്കുള്ള എന്റെപേര് 
ആരും വിളിക്കാറില്ല 
എന്റെ അഭാവത്തിൽ 
പലരും പറയുന്നത് 
ഇരട്ടപ്പേരെന്ന് സുഹൃത്ത് പറഞ്ഞു 
അതിന്റെ അർത്ഥവും
സൗഹൃദം സമ്മാനിക്കുന്നത് 
ഹൃദയത്തെ വെറുതെ നോവിക്കും


അമ്മ 

ആർക്കും 
ഒരമ്മയുണ്ടാകും 
അവർക്ക് 
കാണാതായ മകനും 
ആത്മഹത്യചെയ്ത കുഞ്ഞും 
പീഡിപ്പിക്കപ്പെട്ട മകളും
ഒരു ദുഃസ്വപ്നം തന്നെ 
നിങ്ങൾക്ക് പറയാൻ 
ഒരുപാട് ന്യായങ്ങളും.

വിരൽസ്പർശം

വിരൽസ്പർശം

പ്രിയേ, നിന്റെ നിശ്വാസത്തിൽ 
നയാഗ്രയിലെ വെള്ളച്ചാട്ടം
കണ്ണുകളിലേക്ക് കൂടണയുന്നു
തെളിനീരിന്റെ ധാരയിൽ
ഉതിർന്നു വീഴുന്ന തുള്ളികൾ
ഒഴുകി കവിയുന്നു കവിളുകളിൽ
ഏതു നൊമ്പരത്തിന്റെ
വേലിയിറക്കമാണിപ്പോൾ

നക്ഷത്രങ്ങളെ കോർത്തിട്ട
രാത്രി മഞ്ചത്തിൽ
തനിച്ചിരുന്ന്
സ്വപ്നം കാണുന്ന രാക്കിളിക്ക്
വെളിച്ചവുമായി
മിന്നാമിനുങ്ങുകൾ കൂട്ടിരുന്നു
 ദൂരെ നിന്നൊരു നക്ഷത്രം
ഇറങ്ങിവന്നത്
മിന്നും വെളിച്ചത്തിലലിഞ്ഞു

രാക്കിളിയുടെ കിനാക്കളിൽ
പൂത്തുലഞ്ഞ ആകാശം
പുത്തൻ ചിറകുകൾ വിടർത്തി
പറന്നിറങ്ങിയ ഇണക്കിളി
കൊക്കുകളുരുമി
കഥ പറഞ്ഞിരിക്കുന്നു  

പ്രിയേ, നീ പറയുന്ന ഗംഗാജലം
ഈ കണ്ണീരിലും പരിശുദ്ധമോ
വിതുമ്പുന്ന നിന്റെ ചുണ്ടുകൾക്ക്
ഒരു ജലധാരയുടെ സംഗീതമോ

ഒരു രാമഴ കൂടി നനഞ്ഞുകഴിയുമ്പോൾ
മോഹങ്ങൾ ഈറനണിയുന്നു
ഇമകളിൽ നിന്നുതിരുന്ന
പനിനീർ മൊട്ടുകളിൽ
നിലാവിന്റെ വെള്ളിനൂലുകൾ
ആരോഉപേക്ഷിക്കുന്നു
മധുരമായ് പാടിയ
പകൽപാട്ടിന്റെ ഈണത്തിൽ
സ്വാന്തനത്തിന്റെ വിരൽസ്പർശം........

പൂമ്പാറ്റകളുടെ താളം

പൂമ്പാറ്റകളുടെ താളം 

എഴുതിയ 
തീയതികളിലൊന്നും 
പെൺപൂക്കൾ 
പൂമ്പാറ്റകൾക്കായി വിടർന്നില്ല 

പറക്കമുറ്റും മുമ്പേ 
മുന്നിൽ  കാവലുമായി 
കൈ പിടിച്ചു നീങ്ങിയ 
ഗന്ധ ർവ്വ ന്മാരെ 
നീതിയുടെ നിഷേധം എന്ന് 
അടയാളമിട്ട്  പ്രതിഷേധിക്കുമ്പോൾ 
സ്വയം പഠി ച്ച പാഠങ്ങൾ 
താളത്തിലുള്ള ചലനങ്ങളായിരുന്നു

സ്വാതന്ത്രത്തിന് 
അമൃതിന്റെ രുചിയാണെങ്കിലും 
അമിതപാനം അരുതെന്നേ പറഞ്ഞുള്ളൂ
പൂമ്പാറ്റയുടെ താളം 
പുഴുവിൽ നിന്ന് തുടങ്ങുന്നു
 പെൺപൂക്കൾ 
വിടരുന്നതുവരെ 
തേൻ ഉള്ളിലെവിടെയോ 
ഒളിച്ചിരിക്കുന്നു

വിടർന്നു 
പുഞ്ചിരിക്കുന്ന പൂക്കളെ 
തേടുന്ന പൂമ്പാറ്റകൾ 
തേൻ കണങ്ങൾ 
ഊറ്റിക്കുടിക്കുമ്പോൾ 
കാറ്റ് ചുറ്റിയടിക്കുന്നു

കൊഴിഞ്ഞു വീണ പൂവിനോട് 
വിടപറയാതെ പറന്നുയരുന്നു 
പൂന്തോട്ടങ്ങളിൽ 
പുതുമ മാറാതെ 
പൂമ്പാറ്റകൂട്ടങ്ങൾ . 
....